كاريكاتير | الغاز الجزائري ومايدير.. فين غادي يا ماكرون فين أوا غادي ؟؟!!
وانت كتابع سيناريو العلاقة الغرامية للي كتجمع فرنسا بمعشوقتها الجزائر، كتحس راسك فحالا كتشوف شي حلقات من روتيني اليومي، كل مرة نزاع فشكل وقصة فشكل عمرك تشوفهم متافقين.
ولعل آخر ما قطر به السقف حاليا، هو هاد المحاولة اليائسة لي كدير فرنسا باش تسقي غرور الجزائر عالله وعسى ترضى وتقبل أنها تصالحها. الله يحسن العوان الشتا والبرد جايين المانطا بوحدها ماكفياش وممسخناش خاص ضروري ولابد بركات “الرئيس الجزائري”.
وكما يعلم الجميع إرضاء “تبون” ماشي ساهل كيخاصو أكل دماغ، ودغدغة مشاعر وبرهان على صدق النفس، الشي لي خلى ماكرون يوقف اللقاء لي كان عند فرحات مهني رئيس جمهورية القبايل بإحدى القنوات الفرنسية عبر اتصال هاتفي بدقائق قليلة قبل البث، باش يقولهم آش كديرو الشرفا واش حنا كنطيبو فيهم، البرد جاي خاصنا معامن وانتما بغتيو تبون يغضب أحبس ليا هادشي.
وفعلا داكشي لي كان، تلغى لقاء فرحات مهني، غير باش ماكرون يقول الجزائر انت لي كاينا وماكاين ماحسن، و مع الأسف قصر الإليزيه ماكانش عارف معامن هو، ولقا راسو وسط معمعة خايبة، ومع وحدة طميميعة وماطرياليست طلباتها مغيساليوش بداتها بفرحات مهني وكملاتها ببلاغ السفارة الفرنسية بالمغرب، العجب المتعجب هذا “إحنا اش دخلنا”؟
علاش هاد السفارة لي عندنا غادي تصدر بيان؟ و واش كاع السفارات الفرنسية فكاع أنحاء المعمورة خرجات بهاد البيان ولا مستأصادين المغرب بالضبط ؟ المفروض السفارة الفرنسية بالجزائر هي لي تخرج ببيان القضية فرنسية قبايلو-جزائرية والمغرب مالو؟ وحتى لإمتى غادي تستمر فرنسا فهاد المهزلة؟ على العموم البرد كافر وماشي غير اجي و رضي تبون، ما علينا… مهم حنا ماشي سوقنا وعطيونا بالتيساع !!!
