ماذا يجري بديوان رئيس الحكومة؟ بنكيران و معتصم في عقر دار أخنوش!

هما عندهم جورج بليك و حنا عندنا جامع معتصم، و لي مكيعرفش جورج بليك راه كان ضابط بريطاني و عميل مزدوج عند الاتحاد السوفياتي ، نائب الامين العام لحزب العدالة و التنمية، الصباح كيتكرفط علينا و يمشي يمارس الوظيفة ديالو بكل أريحية عند المشغل الحكومي و يفتي عليه لائحة بالمواد لي مزال مازدش فيهم سيهم أخناتون ، و العشية يضرب ليك الجلابة البنكيرانية هذا لاما شد تسبيح و جلس يردد ورد يالطيف عالله و عسى يكفر بيهم على ذنوب هاد المغاربة لي نزل عليهم هو شاف ديالو فالصباح .
السيهم جامع إسم على مسمى، و كيف كيقولو كل واحد كياخد من سميتو شي حاجة والمعتصم جامع لي مكيتجمهوش الحكومة و المعارضة، الغريب فالامر هو الدفاع الشرس ديال بنكيران على جامع السيد ولا يقول لباقي أعضاء الحزب لي عجبو الحال مرحبا و لي ماعجبوش الباب يفوت جمل ماواقفين على حد، و صراحة هاد الدفاع كخلي الواحد يتساءل مع راسو علاش هاد ردة الفعل كاملة من بنكيران ؟
زعما مايكونش عشق بنكيران لرئاسة الحكومة هو لي مخليه طالق لينا عروقو فالحكومة، و لا يمكن كيعاني من متلازمة ستوكهولم خاصة بعد مادارو ليه الصابونة من الحكومة و قال اش غندير اجي نخشي ليهم شي واحد ولا جوج كاع مالهم أش غيوقع ليهم جوج دريوس ماداو ماجابو نلعب بيهم كفما بغيت أش فيها كاع، وبطبيعة الحال ماكاينش ما حسن من جامع المعتصم و سعد لوديي اللي كان مسؤول عن جريدة التجديد لسان حزب العدالة والتمية ومن لا يعرفها.
دبا خودوني على قد عقلي هادوك القرارات اللي كان اخنوش كياخدهم بناءا على الإستشارة ديال الإخواني جامع واش كان جامع لي كيقولهم و لا حتى هو كيتسنى لليل يطيح ويشاور العراب ديالو بنكيران أثناء ترديدهم الورد و الأمداح المسائية ديالهم، حيث لا كان الحال هكا و غالبا هو كذالك فراه سيهم بنكيران خبراتور فتبياع العجل خاصو الاوسكار .
الحصول و مافيه. شايلاه ا با جامع ها بونجور ديالك و بنكيران طلع فقيه ديال صح وكيعرف يدير الرقية البركانية حتى و هو فالمعارضة، وسؤال أخير قبل مانمشي واش جامع كينعس براس الاخنوشي ولا البنكيراني ولا بهم بجوج ولا ماكيجهش النعاس و كيبدا يلوم فراسو على ذنوب المغاربة لي قتلوهم بالزيادات و زعموا هاد الإستقالة لي قدم كفيلة باش تريح ليه ريوسا ديالو.