الصوحافي علي لمرابط والإرهابي محمد حاجب “لعشا ف..الشيراطون”

هيئة التحريرالجمعة 25 نوفمبر 2022 / 11:11

204

علي لمرابط خواف و خواف كبير من صغرو. والخوف ديالو هو لي خلاه يكون تمتام… الخوف ديالو هو لي خلاه يمرض بالشك أنه ديما محضي و متبوع و مراقب..كل إنسان عندو القرين ديالو لي مكيتشافش…إلا علي لمرابط عندو المخبر ديالو لي ما ماكيفارقوش وماكيشوفو غير هو…ديما داير الاحتياطات…ديما راد البال..عساس الدرب مخبر..مول الحانوت مخبر..الكسال فالحمام مخبر..شيفور الطاكسي مخبر…حفار القبر مخبر…فالحقيقة عندو الصح يدير الاحتياطات و لو ما كاينش علاش…حيت ف آخر المطاف كيطيح فالفخ و كيتفرش….بحال لي تفرش ف لعشا لي دار مؤخرا مع محمد حاجب ولي تمكن المخبر ديالنا يجيب المضمون ديالو و يجيب حتى الحوار لي دار بين هاد الصحفي المشكاك و الإرهابي البركاك…لبركاك ديال الألمان…

فهاد العشا لي كان فمطعم “pegassus” فبروكسيل..علي لمرابط خدا طورتيا بقمرون و شرب 11 بيرا (باش يقدر يعلق على ل11شكاية لي دخلات محمد زيان للحبس) أما حاجب خدا روز و كباب (حاجب كياخد ديما الكباب حيت كيفكرو فالفيلم ديال الإرهاب والكباب..ما طفروش بالإرهاب اللهم يشبع كباب).

علي: أهلا سي حاجب كيف أحوالك وكيف درتي مع الطريق حتى جيتي ل بروكسيل؟

حاجب: الحمد لله..جيت مزيان فالطريق ب طوموبيلتي . راك عارف الإعاقة ديالي ديال 50% حدها استوديو واللايفات..أما مصاريف التنقل ف الله يخلف على القايد ديال duisbourg كيعطيني شهادة الاحتياج ماكنخلص والو… المازوط و pass جواز فابور.

علي: سي زيان مشا للحبس هادي همزة كبيرة باش نكدبو و نشوهو المخزن..قضية بيكاسوس طلعات خاوية وخاصنا باش نتحركو.

حاجب: فعلا أخاي علي فعلا..حتى أنا حاصل…تفرشت فقضية التعذيب وجاب لي الله دابا باش نعمر السوق . سي زيان ديالنا و لكن كل واحد يضرب على عرامو.

علي: واش هو كان فعلا المحامي ديالك ؟ قلبت ف المحاكم د المغرب و ف ديال أوروبا ما لقيت حتى شي ملف ديالك معاه.

حاجب: الله يهديك أسي لمرابط.. أنا و زيان كنا خدامين ف تنوعير و لكدوب على المغرب ..هو محامي ديالي غير من باب التقية..التقية مهمة ف الحياة و كان هذا أول درس تعلمتو فمدرسة القاعدة فاش كنت كنقرا ف أفغانستان.

علي: علاش ياك انت قولتي حدك باكستان فاش كونتي خارج ف سبيل الله ؟

حاجب: الله يهديك أخاي علي..واقيلا المخزن عندو الصح منين تيقول عليك حمق…آشمن خروج ؟ أنا راني مشيت ل أفغانستان باش ندير الخروج ديال بصح… نخرج على الأرواح ديال الكفار و الطغاة واش نسيتي فايت قلتها ليك بيني وبينك حيت أنا عارفك صحفي استقصائي خطير تجيبها تجيبها…ولكن طلعتي راجل سترتيني باش تخدم بيا و تصفي حساباتك مع المخزن.

علي: فعلا نسيت سمح لي نسيت ماخديتش الدوا ديال الراس.. قولي واش عندك شي معلومة خطيرة عطاها ليك سي زيان تقدر تنفعني بيها رآه الوقت ناشفة و خاصني ما نقول.

حاجب: كون كان الخوخ يداوي كون داوا راسو… الله يهديك أخاي علي… زيان كان غير كيشير بالحجر..ياكما كونتي متيق لخرايف ديالو… أنا رآه ضحك علي و صيدني ب دوك المعلومات الحصرية لي كان تيعطيني….بقا كيكدب علي بالموت الرحيم الموت الرحيم حتى لقى راسو فالحبس الرحيم…11 شكاية وحدة تنسيك ف لخرا ..السيد شبعان فساد ف عيالات الرجال داكشي علاش الله ما يسرش لينا ف هاد النضال الخاوي.

علي: إذن هو لي كان تيعطيك المعلومات الحصرية أنا كنت كنقول انت راك مختارق المخابرات المغربية. داكشي علاش جيت نتلاقاك.. راك انت عارف العقدة لي عندي مع هاد المخابرات.

حاجب: والله و بالله وتا الله أنت راك احمق ب وراقيك أخاي لمرابط… غير أجي و اختارق المخابرات المغربية..فعلا انا تعلمت دروس فتقنية الاختراق مع الإخوة ف القاعدة…درس سميتو “الاختراق الأزرق” يعني كيفاش ندير لكدوب والتضليل فالعالم الأزرق اليوتوب والفيسبوك الخ….فاش المؤطرين ديالي ف القاعدة عاقو بيا فيا غير الفم وكداب بالفطرة وجهوني ل هاد النوع من الاختراق…

علي: دابا عاد فهمت إذن من هنا جات لكدبة ديال التعذيب ؟

حاجب : على سلامتك منين فهمتي.. رآه لكدوب والتضليل التاكتيكي داخلة ف التكوين الإرهابي..سي لمرابط واقيلا أنا غالط فيك كان تيحساب لي راك دكي ومطور.

علي: غير سمح ليا غير ما واخدش الدوا..قولي فين وصلتي مع قضية التعويض فالمحكمة؟

حاجب: القضية عندي صعيبة منين تفرشات الكدبة ديال التعذيب موحال واش ناخد شي ريال..عرفتي أنا خايف إلى نولي أنا لي خاصني نعوض ألمانيا منين غادي نجيب لفلوس أ خاي علي منين؟

علي: كاينة عندك الصح..ممكن تدوي مع زكريا المومني يعطيك شوية د لفلوس خليهوم تحت منك الوقت والزمان.

حاجب: و الله إلى نتا مفضي..المومني لقا حتى ما ياكل رآه عايش بالإعانات اكتر مني..وثانيا هداك غير نصاب عنداك تكون متيق هضرتو. قولي أسي لمرابط باش مدور الحركة انت؟

علي: أنا شويا من الخدمة ديالي شوية من فلوس سبليون و بزاااف من فلوس دزاير…دزاير تيخلصو مزيان..إلا بغيتي نشوف ليك معاهم ..اللهم شهرية fixe ولا فلوس التعويض الوهميين.

حاجب: مرحبا أ خاي علي غير شوف ليا مع دزاير رانا حاصل حصلة الكلاب.

فعلا علي لمرابط جبد التلفون و تاصل بالناس ديالو فالمخابرات الجزائرية… حاجب كيشوف بعينيه و وجهو صفر ….كيتسنى لمرابط يكمل المكالمة…من بعد 15 دقيقة لمرابط تلافت عند حاجب كيضحك…قاليه c’est ok دزايرين قبلوك…. قالو لي غدا غادي تسيني معاهم….غدا نتلاقاوهم… لعشا ف شيراطون…..( يتبع).