حميد المهداوي .. الصحفي الذي طالما تغنى بحرية الرأي و التعبير أصبح يصادر حق المغاربة في التعبير عن رأيهم ويصفهم بـ”ولاد الحرام مقطرين”
قبل أن تُنصِّب من نفسك راعي الأخلاق وتشرَعَ في الانتقاد وإملاء ما على الآخرين فعله..تذكر ..بأنك لا تملكُ الحقيقة كاملة.
الحاجة لي حارو فيها العلماء و الفلاسفة وعياو ما يناقشوها و موصلوش لحتى خلاصة خرج علينا الحلايقي المهداوي “للإشارة حتى الحلقة بزاف عليه ماشي أي واحد يتقنها”، كيدعي انه يملكها و على إلمام بيها، و هو لي كيعرفها لدرجة انه تجاوز ظاهر الأشخاص إلى حقيقة نواياهم وأكثر من هذا، السيد يقدر يكلاسيك واش أنت ولد الحلال أولا ينسبك للفراش.
بمجرد ما أنك تنتقد حماس وتعبر على رأيك وتنطق تازة قبل غزة و المغرب أولا فأنت بالنسبة لحميد المهداوي إبن زنا مقطر، الأمر محير واش هاد السيد هو نفسو لي كيظل يتغنى لينا بالحريات و التعبير على الرأي؟ أشنو المشكل إلا الواحد إنتقد حماس؟ كل شخص من حقو يعبر على رأيو نحن في بلد الحريات أولا التعبير كيولي غير الوقت لي مسلككم وكيخدم مصالحكم.
الطامة الكبرى هنا هو ان هاد السيد، في الفيديو كامل هو جالس يدس السم فالعسل و بالداريجة يكوي و يبخ، من بداية الفيديو إلى أخره الخطاب الوحيد لي كنسمعو خطاب تحريضي على الفتنةوالتفرقة بين أطياف المجتمع المغربي ما خلا شلوح ما خلا عرب ماخلا يهود ما خلى مسلمين كفر لي بغا و أسلم لي بغا مهم مع المهداوي مش حتقدر تغمض عينيك.
الصحفي اللي كيقول انه يمارس مهنته بكل أخلاقية و من حقو يعبر أصبح أول من يصادر حق الناس في التعبير، و كيتهمهم بباغين يشعلة العافية فالمغرب على أساس هاد الفيديو لي خرجتي بيه أنت مكيشعلش العافية، حقيقة الأمر كنبغيو نسمعو لتحليلاتكم للساحة المغربية و لكن مع الاسف كلكم بحال بحال وماكاين حتى فرق بينك و بين هذاك و غيرو لي كظل تنتقد فيهم كلكم كتركبو على القضية و كتستغلوا الموجة و كتاجرو فالقضايا الإنسانية لكل الشعوب غير كل واحد بطريقتو فبلاما تبقاو تصدعو لينا راسنا بخطاباتكم الخاوية المدغدغة للمشاعر .
وبالعودة للقضية الفلسطينية، الأوضاع حاليا فغزة كيأزمو كلشي الموت لهيه و الالم هنا و نتعاطف مع المدنيين و ندين بشدة الأعمال الإرهابية، و ماتقولش لي حماس رجال، يا أخي كانو جالسين صحة سلام ناضو تسببو فإبادة جماعية للمدنيين فالقطاع، لي ماقدش على شي حاجة مايجبدهاش والرجال كيفما كتقول كيكونو قد فمهم قد دراعهم، ماشي تنوض تجبد الصداع بقشاوش عيشورا وتبقى مخبي لي فأوطيلات قطر وتزيد شعب على قدو للعصا، وبالمناسبة حماس لي كتقول عليهم رجال راه كيدعموا ليك تقسيم بلادك سمعنا شي حاجة على هاد القضية، أولا نسيت انت راه كتعرف حقيقة الأشياء نقدرو حنا نزكلو شي حاجة.
