الحلقة 3 من حكايات “الدق تم”.. كابرانات وحزب مغمور وأشباه معارضين يفشلون في النيل من المغرب ورموزه !
الإخوان ها واحد السلام عليكم !
هادي واحد المدة و الإخوة العرب طاحو على واحد الكود، لي باغي يتشهر و لا يطلع شي قناة فيوتيوب و لا شي صفحة يجبد المغرب و المغاربة سوا بالزين سوا بالشين. المهم المغرب ولى بحال شي ماركة عالمية مشهورة ولا شي ستار غير كيتجبد كتلقى كلشي كيتسابق عليه.
مؤخرا الأجانب حتى هما طاحو على هاد البلان وليتي تشوفهم تاهما كيهضرو على المغرب و خصوصا من بعد الإنجازات لي وصل ليها المغرب فبزاف ديال المستويات فالسنوات الأخيرة. هاد الناس ولاو كيجيو المغرب كيتعجبو فيه، كيشوفو أن هذه الأرض تطورات بزاف و ولات فارضة راسها إقليميا ودوليا. وبطبيعة الحال هذه هي الفرصة باش يستغلو حتى هما سمية المغرب و يقضيو حاجتهم بحال شي هاشتاغ طالع ترند فتويتر، كتلقى كلشي كيخدم بيه باش يطلع تغريدات ديالو و حسابو.
ومن الجارة الشمالية لبلادنا خرج لينا واحد الحزب حديث النشأة باغي يتشهر ويدير بلاصتو. هاد الحزب كيتواجد في هامش الحياة السياسية بإسبانيا، وكيتزعمو واحد صعلوك لي سبق ليه و زار مخيمات تندوف و إستضفوا بن بطوش، وهادي بوحدها كافية باش تبين لينا بأن هاد الحزب لي كيعرفوه غير أعضاء الحزب و إبراهيم غالي و كبرانات العسكر، كينفد مخططات جزائرية. أشنو غيدير هاد الحزب باش يطلع ترند؟
غادي يرسم لينا واحد الجدارية بمباركة من مخابرات عبلة، كتمس لينا سمعة السدة العالية للمملكة المغربية و تطعن في شرفه، من بعد ماتسالاو ليها كاع الوسائل الشريفة و الغير شريفة لي كتحارب بها المغرب.
الجزائر وصنيعتها بغاو يضربو جوج العصافير بحجرة وحدة. يستغلو الحملة الإنتخابية لي كاينة في إسبانيا، وفنفس الوقت إسم المغرب باش ينتقموا من المغرب و يسيؤوا لصورة الملك محمد السادس.
ماتسرطاتش ليهم إختيار إسبانيا للمغرب و إعترافها بمغربية الصحراء والترابط والإزدهار لي كتعرفو المصالح المغربية الإسبانية، قالك أشنو الحل؟ نضربو سانشيز بالملك محمد السادس وفنفس الوقت يتشهر حزب إسباني ممول من عندنا و يخدم مصالحنا.
المهم حتى لهنا كنتفهم خباثة نية الجزائر و حتى هاد الحزب الناشئ، لكن لمتفهمش ليا هو طريقة تعاطي أشباه المعارضين لي إبتلانا بهم الله مع هاد الجدارية، و كيفاش حاولو يروجو لهاد لكاريكاتير و كيفاش أجمعوا كلهم إبتداءا من داك المحلل ديال الله يحسن العوان ديال العيدودي حتى لولد الكاطريام ديال مومني حول هرطقات ما أنزل بها الله من سلطان، و هادشي إذا دل على شي حاجة، فإنه كيدل على الجهل ديالهم بالأمور السياسية، و بلي داخلين لهاد المعارضة غير سنطيحة لا يفقهون فيها شيئا، وحتى من محاولة كبرانات العسكر الإساءة إلى المغرب وملك المغرب فشلات.
والعجيب أيضا كيفاش هاد المعارضين ديال جوج أورو ضخموا من مكانة هاد الحزب و عطاوه كثر من قيمتو مع العلم انه حزب جدا صغير ماكيعرفو حد، معندو تا شي كلمة فالساحة السياسية الإسبانية، ومع ذلك كنلقاو ديك الطبقة كتدافع عليه بطريقة مستميتة، تقول هو لي غيشد الحكومة من ورا حكومة بيدرو سانشيز، و هادشي راه بدون إنتباه منهم كيفضحهم و كيبين انهم ليسوا بمعارضين و مجرد مرتزقة و كراكيز كتحركهم الجزائر كيفما بغات وقتما بغات، ومكيهمهم لا حقوق الإنسان و لا غيرها من المطالب.
همهم الكبير هو يخدموا مصالحهم الخاصة ولو على حساب قذف أعراض المؤمنين، كما جاء في قوله تعالى في سورة البقرة “إشتروا الحياة الدنيا بالأخرة فلا يخفف عنهم العذاب ولا هم ينصرون” (صدق الله العظيم).
عذابهم فالدنيا مجلوقين ومراض نفسيا و تابعهم عذاب الآخرة !
