كاريكاتير.. زكرياء مومني حبل الكذب قصير وحبل النصاب أقصر منه
هيلو زكيكو ! حموشي في فرنسا !
إيييه شتي أ زكريا… و هانتا تورقتي سمعتي داكشي لي قلتي؟ حموشي مايقدرش يحط رجليه ففرنسا؟؟ متأكد؟؟ شتي بالزربة تحمستي !! كذاب و هاهي بانت ! كذاب و باقي مامركتي، إيوا ؟ كيف جاتك المفاجأة أزكيكو؟
بدعوة رسمية من مسؤولي الأجهزة الأمنية الفرنسية عبد اللطيف حموشي تلاقا بقادة الأمن بفرنسا وتوشح أسيادنا بميدالية الشرف الذهبية فالوقت لي سيهم زكيكو سنين و منين كيقولنا راه نهار غيحط رجليه ففرنسا غيقرقبو عليه و هاد الساعة بنتي لينا غير انت لي مقرقب.
الكلاخ في أبهى صوره، وزكيكو داير بحال شي بير ديال الكذوب. لا ينضب. كل مرة كيخرج لينا بشي نكتة جديدة و الطامة الكبرى هي أنه ماقادرش يتقبل حقيقة راه المدير العام للأمن الوطني خيطي بيطي لفرنسا بدون إحم أو دستور، مُصّر يحط لينا سيناريوهات باش يثمن الهرطقات ديالو.
زكيكو ملي تصدم مسكين و حس بالخذلان وماقدرش يتحمل قوة المفاجأة خرج علينا بواحد الفيديو كيقول أن عبداللطيف حموشي دخل بالتخبية لفرنسا حيث تصاور لي نشر مع المسؤولين الأمنيين الفرنسيين مانشرهم حتى رجع المغرب مايقدرش مسكين يحطهم و يعلن تاريخ الدخول ديالو لفرنسا.
بالله عليك أ بوقال واش كتفكر شوية ؟؟ واش عندك شي عقل و لا داك شوية طيروه ليك فشاطئ “روشيه بيرسي”؟ تا كيفاش السيد نزل ألمانيا و و مايدخلش لفرنسا، و أبسط مواطن يسمع هاد الهضرة غيقولك إلا عندك متابعة ففرنسا غيقرقبو عليك فألمانيا. يعني مادام السيد روشرشي كيفما كتقول، كان خاصهم يوقفو عليه فبرلين ولا السيستيم طايح فألمانيا مساكن ؟؟ ياكما حسابك الجزائر هادوك ياك كنقولك ديما ملي تبغي تكذب كذب الكذبة لي نتيقوها حنا ماشي انت.
واللي كيضحك كثر هو هاد البلان ديال المسؤولين الأمنيين مهربين المدير العام للامن الوطني لفرنسا مدخلينو حارك فاتحين ليه معبر بري… مالو داخل من رفح هو ؟؟ وياك المفروض انهم مسؤولين امنيين إذن خاصهم يقومو بالمهمة ديالهم و يشدوه مادام جا لعندهم برجليه، لاش موشحينو و فرحانين بيه و مكبرين بيه ؟؟
تقبل الخسارة أ زكيكو… راه هاد النكت عندك يوكلوك خبيزة غير مع الجيران اما العالم راه عاق بيك قالك حكا و الواد ساد عليه فرنسا و كندا عندك سوارتهم قبح الله سعيك !!!!
