كاريكاتير | عندما تغيض كفاءة ومصداقية المخابرات المغربية “الطوابري” بوبكر الجامعي

فكل دار كاين كيدار.. مثل مغربي ماتقالش غير هكاك بشكل عبثي، لا.. إنما كدلالة على وجود شي عنصر فاشل فالدار، لي كيحساب ليه الفشل ديالو تمرد غادي يوصلو لشي لدرجة زوينه و هو غير كيهوي بيه فأسفل درك من جهنم..

والكيدار ديال هاد النهار هو بوبكر الجامعي اللي قرر انه يخرج عن طوع عائلتو و يختار لراسو طريق كتجيب العار وكضرب تاريخ و مسيرة عائلة كبيرة في الوطنية و النضال من الجد إلى الأب.

بوبكر اللي سبق و إختار مهاجمة وطنه و الإفتراء عليه وعلى مؤسساته إرضاءا لخصوم المغرب، رجع ثاني كيستفز المغاربة وكيطعن فأكثر المسائل حساسية عندهم واللي هي الصحراء المغربية، ناهيك عن إتهام مغاربة اوروبا بالإرهاب هذا من غير التشكيك في نجاحات المؤسسة الأمنية برجالها اللي ولاو بحال شي شوكة فحلق أعداء المملكة و وحدتها الوطنية.

وفي إطار تفعيل منطق رابح رابح، الجامعي عاوتاني إختار اكثر موقع إسباني معروف بالعداء للمغرب باش يصرفليه و يرد منو شماعة كيعلق عليها الفشل ديالو، و هما ثاني ينتقدوا بيدرو سانشيز على خاطرهم، المهم بيناتهم ماشي سوقنا اللي كيهمنا حنا هو هرطقات البوق المأجور ديال أعداء الوطن.

الجامعي في حواره مع جريدة “بابليكو” قالك أسيادنا أن مخطط الحكم الذاتي بالصحراء المغربية مشروع وهمي لأنه يولد في ظل نظام استبدادي.

السيد مكفاهش المس بثوابت المغاربة لا زاد كملها و قفرها، إتهم الجالية الأوروبية بالإرهاب، ظلما و عدوانا غير باش يلقى دخلة يهاجم يها المؤسسات الأمنية و المدير العام للامن الوطني و مراقبة التراب الوطني عبداللطيف حموشي، قالك حقا ما حقا النجاحات اللي حقاتها هاد المؤسسات غير حيث الإرهابيين اللي في أوروبا مغاربة هادشي علاش  الدول الاوروبية كتستعان بالمخابرات المغربية وبأن هذا سبب توشيح عبد اللطيف حموشي بأسمى الأوسمة، مستكثر على بلادو هاد الإنجازات غير باش يرضي غرور اولياء نعمته.

المضحك فهاد الخزعبلات ديال الجامعي، هو التصريح ديالو بأن أمريكا على الرغم من أنها حليف قوي للمغرب إلا اننا عمرنا نشوفوها كتوشح المدير العام للأمن الوطني و لاديستي بشي وسام ، السيد مافخباروش باللي  المريكان فكرو يجنسوه كاع و يعطيوه بوست صحيح في المخابرات المركزية الأمريكية، قبل 2005 قبل حتى ما يتعين مديرا عاما للديستي، يعني كانو بغاو يطيروه للمغرب، و هذا  ما هو إلا دليل و إعتراف أكبر و أهم من التوشيحات لي دارت ليك الحناش.

و كرد على هاد العرض اللي جا من عند امريكا قالهم عبد اللطيف حموشي “ولدت مغربيا وسأبقى مغربيا وسأموت مغربيا”، و دبا تخيل معايا أنت كون جاك هاد العرض أش كنتي غدير أنا كنجزم انك كنتي وافقتي بالفور و يا شيفور و بالفرحات عليك.

واللي زاد ضحكني كثر فداك الحوار، هو فاش صرح باللي  راه أي واحد في المغرب يهاجم حموشي يدخل للحبس”.. ومع الصحافي بكثرة ماخربق اللوجيك، قالو الصحفي  “وانت علاش ما شدوكش” وهو يقول ليه: “مع دابا أنا جدي من الموقعين على وثيقة الإستقلال و بابا صحافي كبير داكشي علاش” جا حتى الأخر و زبلها، و انت كتهضر على النضال و الحقوق و الحريات، و النزاهة .. وليتي معول على الكالة ديال باك وجدك باش تبقى حر طليق، ولا الأمور كتختلف فاش كيتعلق الأمر بالمصالح الشخصية ديالكم.