أموال الأدسنس و دولارات الكابرانات تُلبس علي المرابط عباءة المحقق والأخير يفشل في تقمّص هذا الدور

بحلة جديدة وعلى طريقة المحقق “كونان” خرج لينا البارح، الصحفي علي المرابط بحلقة حاول ما أمكن يخليها مليئة بالإثارة والغموض و الدوبامين من العنوان إلى آخر الفيديو ولكن الغالب الله، ملي كتكون من عشاق البوز والركوب على أحزان الناس وغير كتمثل باش تجمع فلوس الأدسنس و “تحوس” على دراهم نظام العرايا ورضاهم، مكتصدقش ليك كتبان راه غير مأدي واحد الدور وغير مقنع آ سي المحقق.

ماعلينا، حلقة لانسبيكتور المرابط كانت بعنوان هل تم إغتيال مراد الصغير؟ وبدا كيحلل و كيفسر لينا في طريقة موت مراد الصغير وأسباب الموت وعلاش، و حيث لانسبكتور علوان مهووس بنظرية المؤامرة و البنية السرية ضروري مغادي يلفق هادشي للبنية السرية لي كيعرفها غير هو ورباعتو ظلما و عدوانا.

المهم باش نوضحوا للناس لي كيحاول لانسبكتور لمرابط يستحمرهم ونمشيو معاه دقة دقة و على حساب المعطيات لي قلتي، فراك نسبتي تصفية مراد الصغير لجهات مخزنية وفي نفس الوقت قلتي أن الهالك كان وطنيا وملكيا حتى النخاع، إذا علاش غادي يقتلوه ؟ و الأهم من هادشي أن كل جريمة لها دافع و مستفيد فما الدافع و من المستفيد.

ثاني حاجة قلتي أن العائلة ديالو كتقول بلي الموت ديالو مشكوك فيها، إذن علاش خوه غادي يخرج صوت وصورة و يقول أن الأخ ديالو مات موتة طبيعية وباراكا ماتركبو على الوفاة ديالو و تنهشو السيد فقبرو؟ لو ان خوه مات مقتول و حنا فعصر السرعة و الانترنت فنظرك كان غادي يسكت، و هو اصلا ولد القانون و محامي، كنا اكيد اول حاجة غنشوفو هي الإنتشار الواسع لقضية ديالو.

ثالث حاجة قلتي أنه قد تم الإختطاف ديالو من عناصر ترتدي الزي المدني وماعرف عليهم حتى حاجة حتى وصل لولاية الأمن بطنجة، شوف فهادي أنا كنأكد أنك كا تطنز علينا اي واحد كابر فشي حي شعبي غادي يعرف ان البوليس إلا عينو فشي حد كيطبو عليه مع الفجر ماشي مع الخمسة و نص ديال العشية، ثاني حاجة راك فالفيديو إتهمتي المؤسسة الامنية إتهام خطير جدا تا كيفاش البوليس كيقولو كان خاصك تسب الملك ماشي حنا واش عرفتي القسم ديال البوليس أش كيتقال فيه الشريف ولا لاغير سامع ؟

زدتي قلتي لينا، ولاية الأمن فوجدة قالت أنه متابع بمحاولة بتحريض المغاربة على إسقاط الملكية، و الإخلال بالنظام العام ونفس الوقت السيد معروف عنه ملكي كي درتي ليها السي علي لمرابط هاد التحريات عندك ماشي منطقية، علاش البوليس غادي يجيبو واحد معروف انه ملكي ويلصقو ليه تهمة إسقاط الملكية شوية اللوجيك الشريف راه كنقولو ليكم ديما كذبو كذبة نتيقوها حنا ماشي انتما.

وفق التحريات ديال لانسبكتور لمرابط، قالك أسيادنا الهالك إتصلوا بيه ناس كيدعيو أنهم شرطة من ولاية أمن طنجة، و تالفين وكيقولو ليه أجي لعندنا للمقهى الفلاني وراحنا معرفينش راسنا فين حنا برانيين على المدينة، دبا غير منطقيا كيفاش بوليس طنجة غيقولو ليه حنا تالفين وعلاش غيعيطو عليه لمقهى علاش مايمشيش لولاية أمن طنجة، لنفرض أنهم بوليس و جايين من شي مدينة أخرى كان أكيد غيكون تنسيق بين الشرطة وإذا هم برانيين فأكيد غيسيفطو معاهم واحد ولد المدينة هادشي في حالة ماتقرر أنهم يمشيو عندو أما هاد بلان ديال المقهى كيدخل الشك وغير منطقي.

لانسبكتور علي المرابط، قالك مراد الصغير اختفى 19 يوم تاحد ماعارف عليه شي حاجة واش هاد السيد شايط على حبابو ماعندو عائلة ما عندو صحاب لي يسولو فيه ملي غبر غريب هادشي 19 يوم بلاما يسول فيه شي حد مايمكنش هانتا ثاني كتخربق لينا المنطق.

صاحب نظرية المؤامرة و البنية السرية والمغرب البوليسي قالك أنه سول المحامي ديالو واش تقدر ولاية الأمن تخرج ببلاغ ونفى قالو النيابة العامة هي لي كتخرج ببلاغ و أن النيابة رفضات تخرج بهاد البلاغ، إذا كان داكشي لي كتقول فهاد الدولة لي كتوصفها أنت بالبوليسية واش غادي يغلبها أنها تفرض على النيابة العامة تصدر هاد البلاغ و طوي هاد الملف؟

الحاصول و مافيه.. غير حبس هاد التحريات ديالك لي تكرفصتي فيهم على اللوجيك بهدلتيه من كاع الجوانب و غير شوف ليك شي “توغوموري” نسب ليه فشل هاد التحقيق وبلاما تزيدنا الحلقة الثانية إيلا كانت غتخرج فحال هادي.