كاريكاتير | عبد اللطيف الحماموشي ناطق بإسم عرابي الفوضى
المهم هاد اليومين خرج لينا الوليد لي عند المعيطي منجب، داك عبداللطيف الحماموشي أو كيفما كيسميوه بعض الإخوان غلام المعطي، و قالك تاهو كيحلل و كيكتب لينا مقال على أزمة الحكم في المغرب، و المضحك هنا هو ان هاد الغلام لي كيوصف راسو بالصحفي الباحث و الإستقصائي ماكتب حتى حرف فهاد المقال و إكتفى بتنفيد أوامر الأستاذ ديالو و إعتماد أسلوب العنعنة و الإقتباس من مقالات كل من هشام العلوي، و محمد زيان و والمرابط وأكيد منساوش ولي نعمتو المعيطي، الشي لي إذا دل على شي حاجة كيدل على ان هاد البعلوك مجرد خميميس عند هاد الناس.
أزمة الحكم في المغرب بمجرد مكتقرا هاد العنوان كتقول مع راسك غادي تلقا شي مقال مفصل يقدر ينوض القيامة فهاد الأرض ولكن غير كتغوص فالفقرات ديالو كتكتشف انك ضيعتي واحد جوج دقايق من حياتك مجانا حيث ماتقالت فيه تا حاجة مفيدة مجرد هرطقات و تخاريف الغرض منها الأساسي اتهام المؤسسات الأمنية لي محلقمة هاد رباعة، و هنا غنزيدو نتأكدو ان هاد الوليد راه كينفد غير تعليمات الحاضن ديالو المعيطي، و لي كنعرفو كاملين التهم لي متابع بها قضائيا.
الحماموشي قالك غياب الملك عن الحكم خلى الناس كيجاهرو بإنتقادتهم للقصر و تحديدا الملك، معرفتش فين سمع هادشي حيث غالبا أشياء كتقولها غير الطبقة المعارضة لي هو وسطهم ولي كلفوه باش يكتبها، لأنه وفقا لداك لشي لي كنشوفوه فالشارع الناس ديما فرحانين بشوفة الملك و دائمي الدعاء ليه بالشفاء و مقدرين الحالة الصحية ديالو، فين أخويا سمعتي الشارع الساخط؟
غياب الملك لمدة سنة حسب الحماموشي، خلى واحد الثغرة فالحكم نتج عنها تحالف لما سماه بالبنية السرية واللي الهدف ديالها تستحوذ على الحكم فالمغرب، وكاملين كنعرفو ان هاد البنية كمصطلح مولاها لي خرجها أول مرة هو المعطي منجب، إيه هو هذاك بشحمه ولحمه.
إستعانة هاد الشاب بهاد المصطلح ماشي بريئ وكيزيد يبرهن لينا أنه مسخر لتمرير رسائل الأستاذ ديالو و طبقته، اللي ماشاء الله عندها سرعة بديهية عجيبة و ذكاء خارق قدرات تكتشف وجود بنية سرية و تفضح أهدافها فالوقت لي عجز القصر و الملكية القائمة لأزيد من 12 لقرن يعيقو بيها.
و لي كيضحك كثر هي ديك الفقرة ديال السلطات المغربية تتوجس خيفة من النقاش حول أزمة الحكم و حول الترويج لمفهوم البنية السرية، وهو ما يدل على ان الملكية بدات كتفقد مشروعيتها فالمغرب، يلا زيد مع هذا واقيلا عايش فشي مغرب من غير لي عايشين فيه حنا.
على العموم معرفناش هاد الوليد شكون كيستحمر ولكن لي متأكدة منو ان المعطي و طبقة ديالو لبسوه بردعة و مزيدينو لعافية بهاد الأفكار لي كيحاولو يوصلوهم لينا إنطلاقا من هاد التِّرَّاس لي عندهم، و من هاد المنبر كنقولو ليكم قصدو العين تشربو لي عندو شي مشكل مع شي حد يقصدو نيشان. أما هاد المغالطات ديالكم ما واكلة والو غير خليوها عندكم.
