وليدات ماما فرنسا في موقف لا يحسدون عليه بعد واقعة قتل الشاب القاصر نائل من طرف الشرطة الفرنسية
القضية شخضات ففرنسا أشمنك يا قتيلة و أش أمنك يا عنف و إعتداءات على المواطنين، البلاد لي كانت تعطينا درس فالأخلاق وحقوق الإنسان طلعات مابينها و بين الأخلاق و الحقوق غير السمية، و تفضحات قدام العالم البوليس ديالهم ماعند باباه لا مهنية لا حنية طاشمة ديال الجزارة و القتالة و العنصريين لي طاح عندهم يصفيوها ليه،ولكن أكيد هادشي ماكيبانش لدوك الرهوط ديال وليدات ماما فرنسا لي عندنا، و ضاربين الطم لا حس لا خبر تقول ماعيشينش معانا، حيث المهمة الاولى ديالهم هي يضربو فبلادهم الأم باش ياخدو رضا ماماهم فرنسا .
و في إطار هاد الصقلة لي صقلو قلنا أجي نحاربو شوية الملل و نتخيلو شي محادثة بينهم نشوفو اش كان ممكن يقولو بخصوص هاد الحيحة لي نايضة وهادشي علاش بوبكر الجامعي تاصل هاتفيا بفؤاد عبد المومني ولأن التلفون ديال فؤاد مخترق بواحد التطبيق جديد سميتو “climatiseurus ” تسربات ليهوم هاد المكالمة لي نشرها الصحفي “الجزائري” عبد الحق السم- بريرو.
بوبكر : ca va خويا فؤاد شفتي رآها شاعلة ففرنسا وبغيت نقول ليك بلا ما ندوزو البرنامج ديالنا (المغرب في أسبوع) غادي غير نفرشو راسنا.
فؤاد : مايمكنش خويا بوبكر. أنا من قبل العيد كنقلب غير على شي mountif نلصقو فالبوليس ديال المغرب وااالو .قلت مع راسي هادا الأسبوع ديال الحولي ولابد شي مشكل يوقع فشي سوق و لا فشي رحبة ديال لحوالا و نلصقوه للبوليس ولكن وااالو. مشيت كنشوف فمحطات الكيران والطاكسيات والقطارات ربما شي بوليسي يكون تعدا على شي مواطن أو على شي شيفور أو حتى على شي حولي واااالو. وا مشيت حتى للدار البيضا لدرب مولاي الشريف فالحي المحمدي ربما نلقى شي حاجة وااالو.
بوبكر : سمح لي سي فؤاد نتا لي دابا طلعتي حولي. واش ساليتي من (شهداء كوميرا) وبغيتي تخلق صحة (شهداء لحوالا).أنا براسي ماعجبنيش الحال منين بقيتي كتهضر فالخاوي على المشكل ديال بنكرير و هي شاعلة ف فرنسا. شنو تيقول سي البكاري فهاد الحصلة ديالنا؟.
فؤاد: سي البكاري؟ فين هو بعدا. را عقلو وقلبو غير مع سعيدة العلمي النهار كامل و هو يبكي وينتخصص عليها. سي زيان كان سيفط ليه ميساج قاليه كون راجل و دير شي تدوينة خايبة و سب و عاير التامك باش تدخل لعكاشة حدا سعيدة ولكن ماقدرش. خلاها زيان الحب بزاااف عليه.
بوبكر: والمعطي منجب شنو تيقول؟
فؤاد: المعطي؟ المعطي دوز العيد عند ختو فبنسليمان. دار شي بيعة وشرية مزيانة فلحوالا ما مسوقش لينا.
بوبكر: البانضي غادي يكون بيض شي مْلِيْنَات فلحوالا. كون غير جبتي ليه معاك شي بْكِيْرَات من هولاندا حتى نتا دير بيهوم شوية ديال الصرف حيت قالو لي الهولانديين ما تسوقوش ليكوم لا نتا ولا ادريس ولا فتيحة.
فؤاد: بيني و بينك المعطي عندو الجنسية الفرنسية مايمكنش ليه يخون قسم فرنسا ويهضر ضد البوليس ديالها. لفهامات ديالو حدها المغرب.
بوبكر: دابا شنو المعمول أسي فؤاد؟:
فؤاد: غادي ندوزو الحلقة ديال هاد الجمعة ( 30.6.23) و مانجبدوش الموضوع ديال فرنسا نهائيا و نعلمو المشاهدين أننا غادي ناخدو كونجي حتى ل 11 غشت حتى تكون القضية بردات ف فرنسا. المثل تيقول (كم فضيحة سكتنا عنها بتأجيلها) ههههه.
بوبكر: ولكن كاينة أحداث اخرى جايا فالطريق خطاب العرش و حفل الولاء….شكون لي غادي يسمع لينا ف 11غشت و العطلة هادي؟
:فؤاد: سي بوبكر وا شكون كيسمع لينا من شحاااال هادي؟ الله يهديك. حنا واكلين طرف الخبز بهادشي حتى يحن مولانا. راك شفتي الأسبوع لي فات أنا درت ندوة على انتفاضة 81 و شهداء كوميرا. هاد الندوة حضرو ليها غير حفارين لقبورة لي خرجو تقاعد هادي 30 عام. فآخر الندوة جاء عندي واحد منهوم قالي سي عبد المومني “واش مكتحشمش كون حفرنا وبنينا لقبورة لهاد العدد ديال الموتى لي كتروج ليه من زمان كون حنا ميليونيرات أكثر من الضحى و العمران. ومن الستينات و حنا كنعقلو عليك كتهضر على الموتى ونتا مكتموتش بغينا نعرفو غير واش نتا بنادم ولا زومبي؟”.
بوبكر: ههههه فعلا ما كدبوش. سير على الله فالقالب لي قولتي نمشيو حتى ل11 غشت تكون فرنسا ما ولاتش بحال سوريا على مولانا.
فؤاد: ok حبيبي و هو كذلك.
